آبشار

گویلرده اوچان بیر قوشودوم، دیمدیگی ساری
بیر گون قاپیما اووچولارین دوشدو گوذاری

اوچدوم، قووالاندیم، یئنه اوچدوم، هارا اوچسام؟
بیر آن دا ایتیردیم اوزومو، صبری، قراری

اوخ یاغدی باشیمدان، همی ساغدان، همی سولدان
بیر اوخ قانادیمدان ایلیشیب، یاردی کناری

دوشدوم یئره، بیر کولگه تاپیب تئزجه سیغیندیم
بیر جوتچو توزاق قورموشوموش، دوشدو مهاری

توتدو گوزومو بیر یوخو، گوردوم خیالیمدا،
قاینار سویو، آج دئولری، دورومده حصاری

بیر تک قانادیملا جانیمی زورلا قوتاردیم،
تاپدیم بیر آغاجدان گورونن قیسا دوواری

چاتدیم دووارا، قان آخاراق، آج، سوسوز، عاجز
بیر باشقا بلا تاپمایـا ایندی منی بـــــاری

چوخ چهمدی، سس گلدی دووارین دالیسیندان
بیردن بیری توتدو قانادی، چهدی یوخاری

قوپدو قانادیم، بیر جاناوار آغزینا دوشدوم
دیمدیکله دیم آغزی گوزونو، گوزده قاراری،

آچدیم گوزومو، گئتمیش او قورد، قاش دا قارالمیش
مندن قالیب اوچماق هوسی، بیرده خماری

آرتیق اوچابیلمز، اوزو گولمز ئولویم من،
سینمیش قولو، دوشموش قانادی، بئینی مزاری

فیکریم، خیالیم، کابوسوم اولموش داها اوچماق
گویلرده اوچان بیر قوشودوم، دیمدیگی ساری

شلاله قدسی

27 دی 1399