اورمان دا ئولوم توزو
آلاجاقارانلیق، یوخولو اورمان
قورو یاپراقلاری اسدیرن کولک
نارینجه اخویان آغاج دلن لر
سارماشیق گؤرونجه تیتره ین اوره ک
یاواشجا آتدیم لار آتیب، گئدرکن
کؤلگه لر گؤرورم، یاخین اوزاقدان
گیزلنیب باخیرام جاناوارلارا
آغاج آرخاسیندا، لوش بیر بوجاقدان
اللری قووزانیر گوگلره قده ر
بالاجا بیر اولدوز پاریلتیسی وار
اللری یئننده، اولدوز یوخ اولور
بالتانین سسینین گورولتوسو وار
آغاجلار اگیللر بویونلارینی،
بالتالار گیوتین سایاقی تپیر
قیرلانقیجلار کؤچور، قارقالار ئوتور،
ئولومون توزونو توپراقا سپیر
سانکی اسیرلردیر بو بوجاقدایام
الی قولو باغلی، سوسقون باخیرام
گؤزومون ئونونده جنایت اولور
دیش سیخیب، گؤزومه پالچیق یاخیرام
آغیر بیر جسد دیر یئره سریلن
بیر قولو هاوادا، کسیلن آغاج
قولوندان ساللانیر قورو یاپراقلار
یاشامی آغاجین یاشینا محتاج
ائله بیل دارا چکیبلر بو یاپراقلاری
آغاجین قولوندان، دار بوغازلاردان
ائشیب لر توپراقی، اکیم اوچون یوخ،
آمان قبیر قازان حوقابازلاردان
بوغازیم بیچیلیب، تیتره ییر الیم،
اورگیم پاتدییر، گؤزلریم دولور
بوتاغ لار اگیلیب، سارماشیق ئولوب،
آغاج لار کسیلیب، بو نئجه اولور؟
قاچیرام، قاچیرام، قاراباسان دان
هایانا قاچیرام قارقا سسی وار
هایانا باخیرام ایشیق گؤرونمور
اوستومده ئولومون آج کوله سی وار
ایاغیم ایلیشیر ئولو بیر کؤکه
دوشورم توپراغا،یئره باتیرام
الیمی چاتدیریب، آغاج کؤکونه
اؤزومو ائشیه زورلا آتیرام
گوگدن توپراق یاغیر،قویلاییر گینه
چیخیرام، گینه ده قبره گیریرم
قازیرام دیرناق لا، بیر یئره چاتمیر
الیم ده کی کؤکه باخیب، اریرم
سویوق دور، توپراقین قوجاقیندایام
توپراقی کؤکسومه برک برک باسیرام
توپراقلار قالانیر، یوخلادیر سویوق
یومولور گؤزلریم، قولاغ آسیرام
بیلیرم بیر به بیر سیندیریب، سؤکوب،
آخشاماجان گینه سیندیراجاقلار
ییخیلیب اوست اوسته، قالانیب اودون
بو گئجه اورمانی یاندیراجاقلار
شلاله قدسی
برچسب‌ها:آغاج, اورمان, ئولوم, قارقا
