آبشار

دئیللر قارقا دا ئؤلۆم سسی وار
آجی نغمه سی وار، شوم نفسی وار
کیم بیلیر قلبیندن گئچنی اونون؟
کیم بیلیر نه آرزو نه هوسی وار

سئورم قارقانین قارا اوچوشون
اوجادا اوتوروب، قارا باخیشین
یئرلره سرپیلن قارا ناخیشین
اوچاندا قارتال تک بیر کؤلگه سی وار

بئش یاشدا بیر قیزام، شاهگؤلۆ، خزان
بیر یاغیش یاغیری، توپراغی قازان،
سوْیوق دور، سۆمۆگه، ایلیگه سیزان
قارقالارین اولو ولوله سی وار

آتاملا گئدیریق، یاغیش دا سپیر
قول قولا، ال اله، اوْخویور، گزیر،
الیمیزده سنگک، بیر پونزا پنیر
اۆزۆنده معنالی بیر گۆلمه سی وار

سوْروشورام "بابا! نه اوْلوب اوْیدا؟
قایقالای ییغیسیب، اوْیا، اوْ تایدا"
آتام جوابلاییر: "قارقالار توی دا،
اونلارین توی ماغار عنعنه سی وار"!

دئیرم: "بابا باخ، آغاج باسینا،
قایقالای دایاسیب بۆتۆن جانینا،
آنام ائوده ته دی، جئداخ یانینا،
منین نه بادیسی نه قیدسی وای".

آتام جواب وئریر: "تلسمه هله،
قرار اوْلوب سنه بیر قارداش گله،
بیز بیراز دوْلاناق، اوْ ال بو اله،
آنانین دا ائوده دینجلمه سی وار".

آتام بیر گؤز وورور، قاققیلداییرام،
قارقالار اوخویور، من اوْیناییرام،
قارداشیم اوْلاجاق، من آنلاییرام
اوْ گونون بئله بیر خاطره سی وار.

21 آبان 99

شلاله قدسی